Þá er maður fluttur og hefur það asskoti gott! Margir búnir að koma og skoða og alltaf sömu góðu viðbrögðin Maður gæti ekki haft það betra: ný íbúð, 2 bílar (for the time being), kyrrð og spekt á næturnar, nánasta umhverfi svipar agalegum Akureyraranda þar sem húsin eru eins og í gamla góða Byggðaveginum og umferðin ekki hraðari en 50...

aaaaahhhhhh.... Maður á þetta inni eftir fyrri hús og hýbýli.

Annars er það bara vinnan og óhætt að segja að ég þurfi að búa til einhvers konar fjölmenningarstefnu innan deildarinnar minnar þar sem ansi mörg börn eru af erlendum uppruna! Slíkt hefur ekki komið fyrir í áraraðir innan leikskólans, og sérstakt að þetta séu allt börn 3-4 ára og koma öll á deildina mína. En svona er samfélagið í dag og mun verða enn meir í framtíðinni. Endalaust krúttleg þessi erlendu börn sem bjarga sér með líkamstjáningunni einni, ótrúlega dugleg og fylla mig stolti Deildin mín er sko best, heh.

Svo er vert að geta þess að Forma dagurinn var í dag, kíkti í Borgarleikhúsið og sé ekki eftir því. Virkilega gott framtak og nauðsynlegt, til hamingju með það Formastelpur

Fleira er ekki í fréttum að sinni, afdalabúinn hefur talað.
Hviss bamm búmm!

Komin aftur suður eftir 2ggja vikna stopp í heimahögunum. Aldeilis fínt að slaka á í sveitinni og gera mest lítið annað en fara í fjós og baka gúmmelaði.

Afrekaði eftirfarandi meðan á dvöl minni stóð: Fór á Sigurrósartónleika á þarnæsta bæ, gerðist fjósakona í 4 daga meðan settið fór í frí, snéri heyi á nokkrum túnum, var siðgæðisvörður meðan tveir tjaldbúar gerðu sér gott í sveitinni og drukku mikinn mjöð ásamt bróður mínum og spússu hans, fór á hestbak hjá systur minni neðar í dalnum og fékk langþráðar harrsperrur, rakaði heimreiðina með hrífu, fór í væna nettóferð fyrir mömmu í kaupstaðinn, keypti mér diskinn með Jeff who?, bakaði ýmislegt bakkelsi við góð viðbrögð heimilisfólks, djammaði tvö kvöld á kaffi Akureyri um versló og er ennþá eftir mig, fór í Brynju og borðaði góðan forða af Greifapizzu, þyngdist um hellings kíló, bauð tengdó í kaffi í sveitina, og svaf mikið og vel.

Nú tekur við vinnutörn heldur betur, aðlaganir haustsins að hrannast inn og ég þarf að gerast fjölmenningarleg þar sem vissir foreldrar tala litla sem enga íslensku eða ensku, glúbb...

Svo eru það geggjuðustu fréttirnar: flutningar í nýju íbúðina í næstu viku og næstu helgi!!!! ííííssssk maður er orðinn spenntur! Búin að pakka niður alveg 3svar í huganum og ætlaði að reyna að láta verkin tala í kvöld en kem mér einhvern veginn ekki í það ennþá....iss en það gerir lítið til þar sem ég hef áralanga reynslu af niðurpökkun og flutningum. Not my cup of tea.

Jæja best að fara að pakka! 

Loksins:

Ég er í sveitinni ligga ligga láa!!

Verð í 2 vikur ligga ligga láa!

Planið er að öðlast enduræringu á líkama á sál ligga ligga láa!!

Og læra fullt í ritgerð ligga ligga láa!!

Farvel!

Já, sumir dagar eru öðruvísi en aðrir!

-ætlaði að vakna snemma, -ætlaði að læra mikið í allan dag, -ætlaði að taka til,          -ætlaði í sturtu, -ætlaði að eiga inni að fara í innflutningsteiti í kvöld.

-ætlaði ekki að horfa á sjónvarpið, -ætlaði ekki að sofa, -ætlaði ekki að kaupa mér eyrnalokka, -ætlaði ekki í bíltúr, -ætlaði ekki að rölta laugarveginn, -ætlaði ekki að blogga.

Já, sumir dagar eru hreinlega ekki ætlaðir fyrir kraftaverk.

Hver fann upp á svona dögum? Kannast ábyggilega allir við þá (nema fullkomna leiðinlega fólkið). Kannski þetta sé leið okkar mannfólksins til að cope-a hið daglega amstur í lífinu, ef ekki væru svona dagar þá myndu allir verða geðsjúkir og hlaupa berrassaðir um stræti og torg og tún. Ég tel þetta gefna ástæðu.

Mottó og lærlingur dagsins: Gerðu það besta úr hlutunum, allir hlutir eiga sér ástæðu, þú getur ekki stjórnað örlögunum, horfðu á björtu hliðarnar.

Later!

Jeminn, að maður eigi að sitja inni við ritgerðaskrif allan þennan mánuð. Er ekki alveg að ná þessu ennþá, en kikkar sjálfsagt inn þegar helgin er afstaðin. Eins gott að maður nýti tímann vel og nái að hripa einhverju niður á blað! Allavega er ég búin að skipta um efni og er alveg ágætlega spennt fyrir því nýja.

Hef ekki ennþá klófest loftnetið af bílnum mínum, sú leit á eftir að reynast mér langræk.

Fór á alveg hreint magnaða tónleika í gær! Reykjavík tropic festival kallast þeir og standa yfir í 3 daga fyrir þá sem ekki vita... Tókum þvílíka skyndiákvörðun í gærkvöldi og skelltum okkur þrátt fyrir háar fjárhæðir. Sjáum ekki mikið eftir þessu, hoppa og syngja á grasinu í risastóru tjaldi, verða fyrir smá bjórskvettum og pissa í kamar. Ekta útilegustemning og fullt af góðu fólki sem maður hitti Svo er ekki af verri endanum að geta sagt að maður hafi séð Supergrass live! Magnað. Er ekki frá því að hafa fengið dágóða tónleikabakteríu í mig, allavega verður tónleikaferð að fylgja næstu utanlandsferð hjá mér-ví!

Var svo úti að borða áðan og skemmtum við okkur konunglega við að horfa á flóru af allavega fólki á förnum vegi...það sem stendur upp úr er kona með 2 hunda í bandi , einn risastóran og annan pínulítinn, og páfagauk á öxlinni að labba upp Laugarveginn. Hressandi reykvísk menning.

Plúsa helgarinnar fá Supergrass, humarpizza og grillið í Gravarvogi.

Pís

Söknuðuð þín mín??! (úr Aladín)

Kominn tími á skrif ef til vill....fínt að dunda við það meðan maður situr yfir Evróvision...

-talandi um júró þá fær Sylvía prik frá mér fyrir að gefa skít í þessa úr sér gengnu keppni og standa undir öllu mótlætinu. Snilld. Og mér sýnist finnar vera að taka þetta í kvöld. Ennþá meiri snilld! 

-reykvískur húsnæðismarkaður er ennþá til skammar, maður er á eins konar bið núna uns verð muni lækka. Annars ætla ég bara að kaupa bílskúrinn sem ég bý og selja hann dýrum dómum í brotajárn þegar maður finnur eitthvað.

-í sumar bíða mín ritgerðarskrif, blessuð BA ritgerðin á loks að fæðast. Agalegt að eyða sumrinu í þetta en ekkert annað í boði! Búin að fá námsleyfi allan júní og allt hvað eina, þannig eins gott maður nýti það, huhumm(svindla bara um miðjan fyrir 5 ára stúdentsafmælið sem verður geggjað! Í bjartsýniskasti sótti ég svo um framhaldsnám í námsráðgjöf, fékk auðvitað ekki inn þar sem ég hef ekki lokið BA prófi. Þá ganga sem sagt allir aðrir fyrir, sama hvaða meðaleinkunn maður hefur..algert prump!

-leikskólinn virðist því verða þess heiðurs aðnjótandi að hafa mig enn einn veturinn, heppinn hann.

-sumarhugurinn læðist að manni þessa dagana. Fyrir utan að skrifa ritgerð þá ætla ég að reyna að eiga líf. Ég skal komast í grillmat, sólbað, sveitina og svo framvegis, jei!

-Svo verð ég ofvirk hér á síðunni í júní þegar allir aðrir eru komnir í sumarfrí og hættir að blogga, en ég mun halda uppi stuðinu!

-Hafið þið annars heyrt um fólk sem stelur loftnetum af bílum? látið mig vita...

Hvað er málið með seinustu daga mánaðarins? Alltaf eru þeir jafn erfiðir vegna peningaleysis. Maður neyðist yfirleitt til að hanga heima borðandi rykmaura og horfandi á Guiding.

En í þessum mánuði var mér bjargað fyrir horn. Foreldrar mínir gerðust svo elskulegir að senda mér afmælispening til að kaupa mér eitthvað fallegt, þannig nú get ég bæði farið út úr húsi og keypt mér eitthvað fallegt! Takk milljón sinnum til stórbændanna innan dala norðan heiða...

Annars virðast ekki allir vera í sömu peningakreppu og ég þegar kemur að mánaðarmótum. Labbaði niður í bæ í dag um 6 leytið og gerði ekki annað en að mæta uppábúnu fólki sem var greinilega á leið út að borða í tilefni food and fun hátíðarinnar sem nú stendur yfir í borginni. Þannig maður spyr sig hvort þessu leiðindatímabili mánaðarins ljúki þegar maður verður stærri...hlýtur að vera. Segjum það bara. Svo er víst líka vetrarhátíð þessa dagana, ekki það að ég sé nógu artí til að taka þátt í henni...

Skoða íbúðir á fullu þessa dagana. Ekkert að frétta svo sem. Hef því ekkert meira um það að segja. Reykvískur húsnæðismarkaður er til skammar.

Aldeilis FRÁBÆRT afmæli afstaðið fyrir um viku. Var alveg búin að gleyma hvað það er gaman að halda almennilega upp á afmælið sitt. Nú ætla ég að eiga mörg afmæli framvegis og halda upp á þau öll! 30´s here I come! Takk allir sem komu og voru svona óendanlega skemmtilegir og góðir við mig Che Guevara þakkar líka mikinn velhug, rúmið mitt þakkar englinum viðveruna þessa merkilegu nótt og Sylvía Nótt og Britney senda kveðju!

Annars er yfirvofandi Evróvision keppni á allra vörum um þessar mundir, spennan magnast með hverjum klukkutímanum-eða ekki! Hlakka samt mjög til að sjá hana Sylvíu mína taka þetta í nefið Ég mun sitja yfir snakkáti og bjór með góðu fólki eins og sönnum íslending sæmir þegar þessa keppni ber að garði.

Megiði eiga gott kvöld

Já nú stendur maður svo sannalega á krossgötum í lífinu (allavega samkvæmt móður minni..). 25 ára aldurinn nálgast óðfluga og ég get ekkert að gert. Ég hef gjarnan lifað í þeirri trú að ég hafi stoppað við 23 ára aldurinn og þyrfti því engar áhyggjur að hafa, en nú berast raddir hvaðanæva um að nú nálgist stórafmæli.

Ég hef því ákveðið að ráðast að þessu aldursári með tilþrifum og gera eitthvað merkilegt í tilefni dagsins, hvorki meira né minna! Með í för hef ég allra besta vinkonukjarnann minn (fyrir utan eina) og sumar leggja meira að segja land undir fót til að vera með...Stefnan er því tekin á vit ævintýranna, enda síðasti séns þar sem eftir að 25 árum er náð tekur alvaran við. Þessu má kannski líkja við gæsun fyrir brúðkaup, síðasti séns til að flippa og lifa í eintómu kæruleysi. 

Hvursu alvarlegt árið á eftir að verða mun koma í ljós, en þarna einhvers staðar eiga víst að leynast full menntun, starfsframi, barneignir, húsnæðiskaup, 3 bílar, sumarhús og svo framvegis...

Mikið dýrka ég íslenskar samfélagskröfur (og mömmu mína)...

Já það má með sanni segja að ég kveðji þetta ár með tilþrifum! Haldiði ekki að mín hafi vaknað í dag með þvílíka ógeðistilfinningu (nei ég er ekki ólétt) og magaverki. Ég staulaðist á fætur á endanum, lauk mér af inn á baði um tvisvar sinnum og nartaði svo í epli og drakk goslaust kók fram í eftirmiðdaginn. Og viti menn, ég er bara öll að koma til! Enda er ekkert í boði að vera veikur á gamlársdag, ó nei hósey!

 

 

Hef reyndar þá kenningu að ég hafi fengið sólstind eftir ljósatímann í gær. Var geðveikt dösuð og með hausverk í allt gærkvöld eftir tímann, og síðan ógleði í morgun...

 

 

En núna er ég allavega í góðu yfirlæti hjá tengdó þar sem mín bíður 3ja rétta máltíð, kampavín, konfekt og allt tilheyrandi! Alveg ómótstæðilega glæsilegt hjá frúnni henni tengdamömmu Bestu fyrstu áramót í Reykjavík sem hægt er að eiga hugsa ég..

 

 

Þar sem árið er nú senn liðið er ekki úr vegi að rifja upp það markverðasta sem fram hefur farið hjá manni á árinu:

-ég varð 24 ára í febrúar mér til mikillar mæðu

-ég flutti af Garðastræti á Lindargötu og bý þar í þakhýsi miklu

-ég er komin á vip samning hjá kaffi 22

-ég fór í tæpan mánuð norður í sumarfrí sem var æði! Og þar var haldið ættarmót sem gerist mjög sjaldan í minni fjölskyldu...

-ég gerðist deildastjóri á leikskólanum í haust og vegnar sérlega vel við það

-ég er búin að leita að íbúð og bíl í ansi langan tíma án árangurs

-ég upplifði það að litli bróðir minn trúlofaði sig og margar vinkvenna minna eignuðust         börn eða giftu sig

-ég verð í reykjavík um áramótin sem er rosalegt first time hjá mér, bara gaman

 

 

Ásamt þessum hlutum hefur maður auðvitað lært margt og orðið reynsunni ríkari í skóla lífsins. Maður ætti því að ganga teinréttur inn í næsta ár með reynsuna á bakinu og ný tækifæri handan við hornið...

 

 

Ég nota þá bara tækifærið og óska ykkur öllum gleðilegs árs með þökk fyrir liðið og segi ykkur öllum að ganga hægt um gleiðinnar dyr á nýju ári

 

 

Skál!

 

 

Commenta maður/kona..  og..:

1. Ég segi þér eikkað handahófskennt um þig

2. Ég segi þér hvaða lag/mynd minnir mig á þig

3. Ég segi þér hvaða bragð minnir mig á þig

4 Ég segi þér fyrstu ljósu minninguna mína af þér

5. Ég segi þér á hvaða dýr þú minnir mig á

6. Ég spyr þig að einhverju sem ég hef velt lengi fyrir mér um þig

7. Ef þú lest þetta verðuru að setja þetta á bloggalinginn þinn!

Hehehehe.... 

Hvað er betra en að sitja heima á laugardagskveldi um miðnætti fyrir framan tölvuna og blogga eilítið nokk..? Mér finnst þetta alger lúxus! Eða kannski meira svona það er ekkert í sjónvarpinu og mér drulluleiðist...

En allavega, hafið þið einhvern tíma dottið ofan í svona brjálað hugsunarástand, þar sem heilinn fer á fullt og maður hugsar um allt milli himins og jarðar? Ég fæ gjarnan svona köst á laugardagsmorgnum (eða þegar ég vakna, sem er undir hádegi) og þá ligg ég kannski í meira en klukkutíma og hugsa og hugsa. Þetta er reyndar ýkt gaman

meira síðar....

Sælir landsmenn góðir!

Þá loksins, eftir mikið framkvæmdaleysi og ódug, tók ég mig til og fékk mér símanúmer í holuna mína og þar af leiðandi netið. ADSL tengingu í þokkabót, bara allur pakkinn, þýðir ekkert annað þegar maður er að þessu á annað borð. Já maður er sem sagt orðinn tengdur aftur eftir langt hlé, og farinn að downloada tónlist eins og vitleysingur og hanga á msn og bloggi eins og sönn gelgja...víbbdídei!

Fyrst maður er ekki enn búinn að finna sér íbúð til kaupa og er bíllaus í þokkaót, þá er netið minn allra besti vinur þessa dagana Hljómar kannski sorglega, en mér er alveg sama Maður er auðvitað alltaf af leita en málið er að 90% af bílum og íbúðum (á viðráðanlegu verði) er drasl! Þannig ég ætla bara að vera 101 rotta eitthvað áfram...sem er bara fínt. Maður getur labbað í búðir og keypt sér allt frá second hand sólgleraugum og che guevara plakötum til nýjustu slúðurblaða og hnakkagels. Maður getur líka farið á djammið þegar manni sýnist og þá valið rock í converse skóm eða rassadillur á pinnahælum. Svo ég tali nú ekki um úrval matsölustaða og kaffihúsa, alveg tilvalið fyrir okkur rotturnar. Já, í miðbænum er sko allt til alls. Fyndið að hugsa til þess núna að ég sé fædd og uppalin í afdal einum norðan heiða...

En allavega, annars er maður bara alltaf í vinnunni, og er aldrei veikur! Djöfull er maður hraustur eitthvað, allir veikir í kringum mann (bæði börn og starfsfólk) en aldrei smitast maður. Ég vil þakka hreina fjallaloftinu að norðan góðan stuðning og mikla uppbyggingu ónæmiskerfis. Takk fyrir takk. Annars eru þessi blessuðu börn alltaf jafn indæl (most of the time) og farin að líta á mig sem einhvern drottnara deildarinnar held ég. Kannski því ég er alltaf að hamra á reglunum við þau...en maður knúsar þau inn á milli, þá er maður golden

En allavega, ég skrifa ekki meir núna. Þið þarna sem voruð að ýta og heimta blogg-eat this!!!! Túrillú!

 

 

já ég vona svo sannarlega að ég komist aftur á malbikið með 4 hjól undir mér og stýri í höndunum, því margt fhefur nú gerst frá því ég var hér síðast! Eins og gefa kynnir þá gaf bíllinn hans kallsins upp öndina fyrir ekki svo löngu þannig nú er maður á höttunum eftir góðu eintaki af bíl...helst toyotu corollu ætlum ekki aftur í hjondæ pakkann. hann var nú samt ágætur greyið, það var ekkert honum að kenna að fyrrum eigandi skipti aldrei um tímareim í honum...

Og annað á dagskránni eru íbúðarkaup takk fyrir takk! Erum í óða önn að skoða þessa dagana því við erum komið með leið á að búa í bílskúr upp á þaki með fyllibyttum fyrir nágranna....no judgement! núna er ég til dæmis búin að sitja í odda í tæpa 4 tíma að vafra á netinu eftir íbúð og bílum, geri aðrir betur

Hei já, ég hóf síðan störf mín sem deildastjóri á leikskólanum mínum núna eftir sumarfrí og gengur svona líka bara vel. Kominn tími á að maður fái eitthvað í budduna fyrir þetta djobb mín markmið verða: engir nammidagar, nóg af róandi pillum útí pelana og rauðvín með matnum! Nei ég er nú bara að gantast núna, því þessi börn eru algerir snillingar

og svo er aldrei að vita hvort maður geti fengið internet tengingu í nýju villunni sem maður flytur í, og þá kannski nenni ég að blogga eitthvað, annars finnst mér bloggið vera að renna sitt skeið hjá mörgum....

en anyways, túrillú!

ví! rosalega er gaman að fá svona mörg comment, ég er alveg bara orðin æst í að skrifa meira!

Ég er að pæla að flytja til útlanda, finna eitthvað fótboltalið handa kallinum mínum og stinga af! Finn þessa gífurlegu orku þessa dagana sem heitir: I wanna do something great and crazy with my life!

Þarf nokkuð að klára lokaritgerð áður en maður fer til útlanda, hm.....ansk!

Allar góðar og sniðugar hugmyndir þessu tengt eru vel þegnar

blæ